اللي سافر عنده حق
واللي هاجر عنده حق
واللي يغضب واللي يكره
واللي يشتم عنده حق
كل حاجه إزاي بتغلا ؟؟؟
وإحنا لأ ؟
كل يوم... بيلَطّمونا
والجنيه بيلَطّموه
سابوا ناس بتمص دمه
ثم ناهشوا لحم أمه
والنهاية عوموه
والدولار أبو لمعه خضرة 
كل يوم بيلمعوه
والجنيه ترمس وخُضرة
طلعوا ملّة أبوه
..
الجنيه أبو ضحكة باهته
واللي كان له ألف قيمة
شغلوه كومبارس صامت
جوه أزفت فيلم سيما
بكرة ترجع ألف ريما
تعمل العادة القديمة
ثم توسع برضه منهم
ثم تاني يعوموه
بكرة تبقى الـ100 فضه
والجنيه تتشل قيمته
بكره هاتهل المجاعة
والفقير هاتقوم قيامته
أو نبيع خفرع وخوفو
بكرة ممكن يوم تشوفوا
حد ماشي ب رغيفين
ومداريهم تحت باطه
أنتوا ليه مستغربيين
وإحنا موتنا من سنين
من زمان الشعب طيب
من زمان بنسف طين
مربوطين ف ألف ساقية
والسؤال الصعب جدا
هي مصر لسه باقية؟؟